«Հրապարակ». Սկանդալի հերոս ուսուցչուհին դպրոցից հեռացել է
Նախորդ տարի՝ մայիսին, Փարաքար խոշորացված համայնքի Մերձավանի դպրոցի պատմության ուսուցչուհի Ռոզա Դավթյանը սկանդալի կիզակետում էր հայտնվել: Ողջ հանրապետությունը քննարկում էր ուսուցչուհու եւ աշակերտների միջեւ տեղի ունեցած սկանդալը:
Աշակերտները եւ ծնողները հայտարարել էին, որ ուսուցչուհին ասել է․ «Հային ճանաչելով՝ թուրքին սիրում եմ»։ Համացանցում տեսանյութ էր տարածվել, որտեղ աշակերտները պնդում էին, որ ուսուցչուհին դասի ժամին յասաման է կերել։ Ուսուցչուհին էլ ասում էր, որ նման բան չկա, դա սուտ է։ Կատարվածից հետո ԿԳՄՍ նախարարությունը հայտարարություն էր տարածել՝ խստորեն դատապարտելով միջադեպը եւ պաշտպանելով ուսուցչուհուն։ «ՀՀ կրթության, գիտության, մշակույթի եւ սպորտի նախարարությունը խստորեն դատապարտում է Արմավիրի մարզի Փարաքար համայնքի Մերձավան գյուղի միջնակարգ դպրոցում տեղի ունեցած միջադեպը, որի ընթացքում պատմության ուսուցչի նկատմամբ դրսեւորվել է անթույլատրելի վերաբերմունք՝ դպրոցի տնօրենի ժամանակավոր պաշտոնակատարի, որոշ ուսուցիչների, աշակերտների եւ ծնողների մասնակցությամբ»։
Նախարարությունից նշել էին, որ Մերձավանի դպրոցն իրենց ուշադրության կենտրոնում է լինելու: Խնդրին էր անդրադարձել նաեւ ՀՀ ՄԻՊ-ը, իսկ ՔՊ-ականներն իրենց անձնական պաշտպանության տակ էին վերցրել ուսուցչուհուն, որը, ըստ նրան ճանաչողների, մի շարք դպրոցներում է աշխատել, սակայն ամենուր կոնֆլիկտ է ստեղծել եւ դպրոցից դպրոց տեղափոխվել:
Նաեւ համացանցում հրապարակումներ եղան, որ 58-ամյա մանկավարժը հաշվառված է բուժհաստատություններից մեկում եւ ունի հոգեկան առողջության հետ կապված խնդիր:
Մեզ պատմեցին, որ տեղի ունեցածից հետո ուսուցչուհին որոշ ժամանակ աշխատել է դպրոցում, սակայն վերջերս հեռացել է Մերձավանի դպրոցից:
Մերձավանի միջնակարգ դպրոցից «Հրապարակի» հետ զրույցում ասացին, որ Ռոզա Դավթյանն այլեւս չի աշխատում դպրոցում։ «Ինչի՞ համար եք ուզում ճշտել, նա էլ չի աշխատում մեզ մոտ: Մենք հիմա հանգիստ աշխատում ենք»,- ասաց տնօրենը եւ հավելեց, որ ո՛չ տեղյակ է Դավթյանի մասին, ո՛չ էլ ուզում է տեղեկանալ: Իսկ թե ինչու է հեռացել Մերձավանի դպրոցից կամ գուցե` հեռացվել, տնօրենն ասաց՝ գաղտնիք է, չի կարող մեզ ասել:
Զրուցեցինք նաեւ Արմավիրի մարզպետարանի կրթության վարչության պետ Սոնյա Բուդաղյանի հետ։ «Իմ տեղեկություններով, Ռոզա Դավթյանը մինչեւ սեպտեմբերի 1-ն աշխատել է Մերձավանի դպրոցում, իսկ թե հիմա ինչու չի աշխատում, տեղյակ չենք: Մեր լիազորությունները, ըստ նոր փոփոխությունների, սահմանափակված են»: Դպրոցները, հիշեցնենք, սեպտեմբերի 1-ից անցել են ԿԳՄՍՆ-ի ենթակայությանը։