«Հայկական խաչքարերի արվեստ․ խաչքարերի խորհուրդն ու խաչագործությունը»․ ճանաչողական այց Փարաքար համայնքի երիտասարդների համար
· Փարաքար
Փարաքար համայնքը գրում է.
«Հայկական խաչքարերի արվեստ. խաչքարերի խորհուրդն ու խաչագործությունը». այս խորագիրն էր կրում հոկտեմբերի 15-ին Փարաքար համայնքի երիտասարդների համար կազմակերպված ճանաչողական այցը դեպի Թաիրով բնակավայրում գործող քանդակագործ Կամո Վարդանյանի արհեստանոց:
Այցի նպատակը երիտասարդներին հայկական ոչ նյութական մշակութային ժառանգությանը հաղորդակից դարձնելն էր, ինչպես նաև ՅՈՒՆԵՍԿՕ-ում գրանցված մշակութային արժեքների պահպանման ու հանրահռչակման կարևորության գիտակցմանը նպաստելը:
Քանդակագործը երիտասարդներին ներկայացրեց իր արհեստանոցը, ստեղծագործական գործունեությունն ու կերտած աշխատանքները՝ մանրամասն անդրադառնալով հայկական խաչքարագործության առանձնահատկություններին, խաչքարերի խորհրդին և դրանցում ամփոփված հոգևոր ու մշակութային արժեքներին։
Երիտասարդության և զբոսաշրջության ոլորտների համագործակցության շրջանակում կազմակերպված այցը մասնակիցների համար նոր գիտելիքներ ձեռք բերելու, համայնքի մշակութային ներուժը բացահայտելու և պատմամշակութային արժեքներն առավել լավ ճանաչելու հնարավորություն էր։
Օրվա ընթացքում ստացած տպավորություններով ու նոր բացահայտումներով ոգևորված՝ երիտասարդները պատրաստակամությունը հայտնեցին շարունակելու ճանաչողական այցերը՝ բացահայտելով համայնքի այլ զբոսաշրջային ուղղություններ ևս։