Բացահայտիր Արմավիրը. Քարակերտի բրոնզեդարյան դամբարանադաշտը
Արմավիրի մարզի Քարակերտ համայնքի տարածքում է գտնվում տարածաշրջանի հնագույն պատմությունն ու մշակույթը փաստող կարևորագույն հնագիտական հուշարձաններից մեկը՝ հիսուն հեկտարների վրա տարածվող ընդարձակ դամբարանադաշտը:
Այս հնավայրը թվագրվում է մեր թվարկությունից առաջ II-I հազարամյակներով (ուշ բրոնզի և երկաթի դարաշրջան) և հանդիսանում է պատմական մեծ արժեք ներկայացնող հուշարձանախումբ:
Պատմամշակութային այս վայրը տեղակայված է Քարակերտից դեպի Արգինա տանող ավտոճանապարհի ձախակողմյան հատվածում:
Տեղանքն իրենից ներկայացնում է բաց, բլրապատ և չոր կլիմայական գոտուն բնորոշ լանդշաֆտ, որտեղ մակերեսային շերտում ընդգծված են հրաբխային բազալտե խոշոր քարաբեկորներն ու կրոմլեխների (քարե շրջանների) հետքերը:
Նմանատիպ դամբարանադաշտերը բնորոշ են տվյալ ժամանակաշրջանի թաղման ծիսակարգերին և վկայում են հազարամյակներ առաջ այս տարածքում գոյություն ունեցած զարգացած համայնքների, նրանց հավատալիքների ու սոցիալական կառուցվածքի մասին:
Արմավիրի մարզի այս հատվածում գտնվող պատմական ժառանգության պահպանումն ու գիտական հետազոտությունը կարևոր նշանակություն ունեն Հայկական լեռնաշխարհի հնագույն բնակեցման փուլերն ու միգրացիոն ուղիները լիարժեք ուսումնասիրելու համար:
Հուշարձանի անձեռնմխելիության ապահովումն ու դրա հանրայնացումը նպաստում են տարածաշրջանի զբոսաշրջային ու գիտական ներուժի բարձրացմանը:
Լուսանկարները` Հուշարձանների պահպանության Արմավիրի մարզային ծառայության: